पाल्पा । ऐतिहासिक, धार्मिक तथा पर्यटकीय दृष्टिले महत्वपूर्ण सिद्धबाबा मन्दिर विकास समिति, तिनाउ–३ दोभानको अध्यक्षमा अरविन्द पाण्डेय चयन हुनुभएको छ । वार्षिक साधारणसभा तथा अधिवेशनबाट उहाँको अध्यक्षतामा १७ सदस्यीय नयाँ कार्यसमिति सर्वसम्मत रूपमा गठन गरिएको निर्वाचन समितिका संयोजक महेन्द्र पाण्डेले जानकारी दिनुभयो ।
यस्तैगरी समितिको उपाध्यक्षमा शेरजंग थापा, सचिवमा विष्णुप्रसाद पाण्डेय, सहसचिवमा कुमारी खड्का र कोषाध्यक्षमा तोया लम्साल चयन हुनुभएको छ । सदस्यहरूमा सन्तोष शेरचन, रामबहादुर थापा, दुर्गा श्रेष्ठ, नयना क्षेत्री, कमल श्रेष्ठ, वर्षा रायमाझी, नारायणप्रसाद घिमिरे र चित्रबहादुर थापा रहनुभएको छ । कार्यसमितिमा समावेशिता र पारदर्शिता कायम गर्न गाउँपालिका, राजनीतिक दल, पुजारी पक्षबाट सदस्य मनोनित गरी १७ सदस्यीय कार्यसमिति बनाइएको जनाइएको छ ।
सिद्धबाबा मन्दिर पाल्पाको प्रमुख धार्मिक आस्थाको केन्द्र मात्र नभई बुटवल–तानसेन सडकखण्ड हुँदै यात्रा गर्ने श्रद्धालु र पर्यटकका लागि महत्वपूर्ण गन्तव्यका रूपमा परिचित छ । तिनाउ नदीको किनारमा अवस्थित यो मन्दिर प्राकृतिक सौन्दर्य, ऐतिहासिक महत्व र धार्मिक विश्वासका कारण आन्तरिक तथा बाह्य पर्यटक आकर्षित गर्ने स्थलका रूपमा विकसित हुँदै आएको छ । विशेषगरी पर्व, मेला तथा धार्मिक अवसरहरूमा यहाँ ठूलो संख्यामा भक्तजनको उपस्थितिले यसको महत्व अझ उजागर गर्ने गरेको छ ।
नवनिर्वाचित अध्यक्ष अरविन्द पाण्डेयले मन्दिर क्षेत्रको समग्र विकास, व्यवस्थापन र संरक्षणलाई प्राथमिकतामा राख्दै धार्मिक पर्यटन प्रवद्र्धनमा जोड दिने प्रतिबद्धता व्यक्त गर्नुभयो । उहाँले सबै पक्ष संगको समन्वय र सहकार्यमा मन्दिर परिसरको पूर्वाधार सुधार, सरसफाई, तीर्थयात्रीका लागि आवश्यक सुविधा विस्तारका कार्यक्रम अघि बढाउने बताउनुभयो ।
नयाँ कार्यसमितिले सिद्धबाबा क्षेत्रलाई सुरक्षित, व्यवस्थित र आकर्षक पर्यटकीय गन्तव्यका रूपमा विकास गर्दै धार्मिक आस्थासँगै पर्यटन प्रवद्र्धनमा योगदान पु¥याउने विश्वास सरोकारवालाले लिइएका छन् ।
